Министр Бообек Ажикеев Ысык-Көлдөгү сел каналынын курулуштары менен таанышты

20-майда Бообек Ажикеев иш сапардын алкагында Тамчы айылындагы “Ысык-Көл” эл аралык аэропортун сел сууларынан коргоого ала турган дамбанын курулуш иши менен таанышты. Туристтик аймакта жагымдуу шарттарды түзүү менен коопсуздук маселеси да башкы орунда экени талашсыз. Андыктан министр дамбаны куруу жумушунун сапатына өзгөчө көңүл буруу талабын койду. Алдын ала болжолдонгон планга ылайык, дамбаны куруу ишин 4 ай ичинде бүткөрүү каралган.

Андан соң Чолпон-Ата шаарындагы 1816 метр узундуктагы “Тогуз-Булак” сел өтүүчү каналын куруу ишинин 3-этабы тууралуу шардын мэри маалымат берди.

Тоо боорунан тартылган сел каналына цемент плиталары төшөлүп бүтсө, Чолпон-Ата шаарындагы 150 турак үй, “Рух-Ордо” этномаданият комплекси, 30 конок үй, 16 соода түйүнү, ички чарбалык жолдор жана Ананьево – Балыкчы негизги унаа жолунун 82-чакырымындагы 300 метр аралыгы сел каптоо коркунучунан коргоого алынат.